政情：搞搞政：立會職員還神傳統曝光
19-08-2010
呢排立法會抖暑，好多議員都外遊，按道理立法會應該水盡鵝飛，但尋日下晝兩點幾就有人睇到二十幾個立法會秘書處職員同保安部同事，喺秘書長Pauline吳文華同法律顧問Jimmy馬耀添帶領下，喺立法會大樓露台切燒豬拜神。
之不過，七夕已過、鬼節未到，到底佢哋拜乜嘢呢？知情人士同我哋講，立法會休會後還神係多年慣例，佢聽聞某年秘書處好多人有病痛，仲有個高層病重，甚至有同事無故受傷，當時秘書處有人提議不如拜吓神，於是其他人就跟住做。之後大家嘅病痛有冇好番就無從考究，不過自此秘書處每到休會就會揀個吉時吉日還神，只係一直冇畀人發現啫！
我哋睇過通勝，尋日係宜祭祀祈福，下晝一點至三點仲最適合酬神，睇嚟  auline為咗還神，實在花咗唔少心思。
喺上個立法年度，勞聯嘅議員李鳳英喺大樓嘅樓梯跌咗落嚟傷咗盆骨，及後又經歷高鐵撥款同政改表決兩項超具爭議性嘅議題，全體職員都陷入精神緊張，保安部仲有幾個職員受傷，最後可以順利過渡，的確還得神落。睇怕 P auline仲要祈求下一個立法年度，議事廳要出入平安！
| 
發表於 2010-9-28 00:49
|